①Quibus rebus cognitis, Caesar apud milites contionatur.
Omnium temporum iniurias inimicorum in se commemorat;
a quibus deductum ac depravatum Pompeium queritur invidia atque obtrectatione laudis suae,
cuius ipse honori et dignitati semper faverit adiutorque fuerit.
②Novum in re publica introductum exemplum queritur,
ut tribunicia intercessio armis notaretur atque opprimeretur;
quae superioribus annis armis esset restituta.
③Sullam nudata omnibus rebus tribunicia potestate tamen intercessionem liberam reliquisse.
④Pompeium, qui amissa restituisse videatur, dona etiam, quae ante habuerint, ademisse.
⑤Quotienscumque sit decretum, darent operam magistratus, ne quid res publica detrimenti caperet (qua voce et quo senatus consulto populus Romanus ad arma sit vocatus), factum in perniciosis legibus, in vi tribunicia, in secessione populi templis locisque editioribus occupatis:
⑥atque haec superioris aetatis exempla expiata Saturnini atque Gracchorum casibus docet;
quarum rerum illo tempore nihil factum, ne cogitatum quidem.
nulla lex promulgata, non cum populo agi coeptum, nulla secessio facta.
⑦Hortatur, cuius imperatoris ductu VIIII annis rem publicam felicissime gesserint plurimaque proelia secunda fecerint, omnem Galliam Germaniamque pacaverint,
ut eius existimationem dignitatemque ab inimicis defendant.
⑧Conclamant legionis XIII, quae aderat, milites
─ hanc enim initio tumultus evocaverat, reliquae nondum convenerant ─
sese paratos esse imperatoris sui tribunorumque plebis iniurias defendere.
