①Eo biduo Caesar cum equitibus DCCCC, quos sibi praesidio reliquerat, in castra pervenit.
Pons, qui fuerat tempestate interruptus, paene erat refectus;
hunc noctu perfici iussit.
②Ipse cognita locorum natura ponti
castrisque praesidio sex cohortes relinquit atque omnia impedimenta
et postero die omnibus copiis triplici instructa acie ad Ilerdam proficiscitur
et sub castris Afranii constitit et ibi paulisper sub armis moratus facit aequo loco pugnandi potestatem.
Potestate facta Afranius copias educit et in medio colle sub castris constituit.
③Caesar, ubi cognovit <per> Afranium stare, quo minus proelio dimicaretur,
ab infimis radicibus montis intermissis circiter passibus CCCC castra facere constituit,
④et, ne in opere faciundo milites repentino hostium incursu exterrerentur atque opere prohiberentur,
vallo muniri vetuit,
quod eminere et procul videri necesse erat,
sed a fronte contra hostem pedum XV fossam fieri iussit.
⑤Prima et secunda acies in armis, ut ab initio constituta erat, permanebat;
post hos opus in occulto a III(tertia) acie fiebat.
Sic omne prius est perfectum, quam intellegeretur ab Afranio castra muniri.
⑥Sub vesperum Caesar intra hanc fossam legiones reducit
atque ibi sub armis proxima nocte conquiescit.
