①Adventu L.Vibulli Rufi, quem a Pompeio missum in Hispaniam demonstratum est,
Afranius et Petreius et Varro, legati Pompei,
quorum unus Hispaniam citeriorem <tribus legionibus,
alter ulteriorem> a saltu Castulonensi ad Anam duabus legionibus,
tertius ab Ana Vettonum agrum Lusitaniamque pari numero legionum optinebat,
②officia inter se partiuntur, uti
Petreius ex Lusitania per Vettones cum omnibus copiis ad Afranium proficiscatur,
Varro cum iis, quas habebat, legionibus omnem ulteriorem Hispaniam tueatur.
③His rebus constitutis, equites auxiliaque
toti Lusitaniae a Petreio,
Celtiberiae, Cantabris barbarisque omnibus, qui ad Oceanum pertinent, ab Afranio imperantur.
④Quibus coactis celeriter Petreius per Vettones ad Afranium pervenit,
constituuntque communi consilio bellum ad Ilerdam propter ipsius opportunitatem gerere.
