①Misso ad vesperum senatu omnes,
qui sunt eius ordinis, a Pompeio evocantur.
Laudat <promptos> Pompeius atque in posterum confirmat,
segniores castigat atque incitat.
②Multi undique ex veteribus Pompei exercitibus
spe praemiorum atque ordinum evocantur,
multi ex duabus legionibus, quae sunt traditae a Caesare, arcessuntur.
③Completur urbs et ipsum comitium tribunis, centurionibus, evocatis.
④Omnes amici consulum, necessarii Pompei
atque eorum, qui veteres inimicitias cum Caesare gerebant,
in senatum coguntur;
⑤quorum vocibus et concursu terrentur infirmiores, dubii confirmantur,
plerisque vero libere decernendi potestas eripitur.
⑥Pollicetur L. Piso censor sese iturum ad Caesarem,
item L. Roscius praetor, qui de his rebus eum doceant;
sex dies ad eam rem conficiendam spatii postulant.
⑦Dicuntur etiam ab nonnullis sententiae,
ut legati ad Caesarem mittantur,
qui voluntatem senatus ei proponant.
