①Quo cum venisset,
cognoscit missum <in Hispaniam> a Pompeio Vibullium Rufum,
quem paucis ante diebus Corfinio captum ipse dimiserat;
②profectum item Domitium ad occupandam Massiliam navibus actuariis septem,
quas Igilii et in Cosano a privatis coactas servis, libertis, colonis suis compleverat;
③praemissos etiam legatos Massilienses domum, nobiles adulescentes,
quos ab urbe discedens Pompeius erat adhortatus,
ne nova Caesaris officia veterum suorum beneficiorum in eos memoriam expellerent.
④Quibus mandatis acceptis
Massilienses portas Caesari clauserant;
Albicos, barbaros homines,
qui in eorum fide antiquitus erant montesque supra Massiliam incolebant,
ad se vocaverant;
⑤frumentum ex finitimis regionibus atque ex omnibus castellis in urbem convexerant;
armorum officinas in urbe instituerant;
muros, portas, classem reficiebant.
