①His datis mandatis
Brundisium cum legionibus VI pervenit,
veteranis III
et reliquis, quas ex novo dilectu confecerat atque in itinere compleverat;
Domitianas enim cohortes protinus a Corfinio in Siciliam miserat.
②Repperit consules Dyrrachium profectos cum magna parte exercitus,
Pompeium remanere Brundisii cum cohortibus XX(viginti);
③neque certum inveniri poterat, obtinendine Brundisii causa ibi remansisset,
quo facilius omne Hadriaticum mare ex ultimis Italiae partibus regionibusque Graeciae in potestate haberet
atque ex utraque parte bellum administrare posset,
an inopia navium ibi restitisset;
④veritusque ne ille Italiam dimittendam non existimaret,
exitus administrationesque Brundisini portus impedire instituit.
