①Interim Caesari nuntiatur
Sulmonenses, quod oppidum a Corfinio VII milium intervallo abest,
cupere ea facere, quae vellet,
sed a Q. Lucretio senatore et Attio Peligno prohiberi,
qui id oppidum VII cohortium praesidio tenebant.
②Mittit eo M. Antonium cum legionis XIII cohortibus V.
Sulmonenses, simul atque signa nostra viderunt,
portas aperuerunt universique, et oppidani et milites, obviam gratulantes Antonio exierunt.
③Lucretius et Attius de muro se deiecerunt.
Attius ad Antonium deductus petit ut ad Caesarem mitteretur.
Antonius cum cohortibus et Attio eodem die, quo profectus erat, revertitur.
④Caesar eas cohortes cum exercitu suo coniunxit
Attiumque incolumem dimisit.
Caesar primis diebus castra magnis operibus munire
et ex finitimis municipiis frumentum comportare
reliquasque copias exspectare instituit.
⑤Eo triduo legio VIII ad eum venit
cohortesque ex novis Galliae dilectibus XXII
equitesque ab rege Norico circiter CCC.
Quorum adventu altera castra ad alteram oppidi partem ponit;
his castris Curionem praefecit.
⑥Reliquis diebus oppidum vallo castellisque circummunire instituit.
Cuius operis maxima parte effecta,
eodem fere tempore missi a Pompeio revertuntur.
