①Auximo Caesar progressus omnem agrum Picenum percurrit.
Cunctae earum regionum praefecturae libentissimis animis
eum recipiunt exercitumque eius omnibus rebus iuvant.
②Etiam Cingulo,
quod oppidum Labienus constituerat suaque pecunia exaedificaverat,
ad eum legati veniunt,
quaeque imperaverit se cupidissime facturos pollicentur.
③Milites imperat: mittunt.
Interea legio XII Caesarem consequitur.
Cum his duabus Asculum Picenum proficiscitur.
Id oppidum Lentulus Spinther X cohortibus tenebat;
qui Caesaris adventu cognito profugit ex oppido
cohortesque secum abducere conatus
magna parte militum deseritur.
④Relictus in itinere cum paucis incidit in Vibullium Rufum
missum a Pompeio in agrum Picenum confirmandorum hominum causa.
A quo factus Vibullius certior, quae res in Piceno gererentur,
milites ab eo accipit, ipsum dimittit.
⑤Item ex finitimis regionibus quas potest contrahit cohortes ex dilectibus Pompeianis;
in his Camerino fugientem Lucilium Hirrum cum sex cohortibus,
quas ibi in praesidio habuerat, excipit;
quibus coactis XII efficit.
⑥Cum his ad Domitium Ahenobarbum Corfinium magnis itineribus pervenit,
Caesaremque adesse cum legionibus duabus nuntiat.
⑦Domitius per se circiter XX cohortes Alba, ex Marsis et Paelignis, finitimis ab regionibus, coegerat.
