①Adventu Caesaris cognito,
decuriones Auximi ad Attium Varum frequentes conveniunt;
docent sui iudicii rem non esse;
neque se neque reliquos municipes pati posse
C. Caesarem imperatorem, bene de re publica meritum, tantis rebus gestis, oppido moenibusque prohiberi;
proinde habeat rationem posteritatis et periculi sui.
②Quorum oratione permotus Varus
praesidium, quod introduxerat, ex oppido educit ac profugit.
③Hunc ex primo ordine pauci Caesaris consecuti
milites consistere coegerunt.
④Commisso proelio,
deseritur a suis Varus;
nonnulla pars militum domum discedit;
reliqui ad Caesarem perveniunt,
atque una cum iis deprensus L. Pupius, primi pili centurio, adducitur,
qui hunc eundem ordinem in exercitu Cn. Pompei antea duxerat.
⑤At Caesar milites Attianos collaudat, Pupium dimittit,
Auximatibus agit gratias seque eorum facti memorem fore pollicetur.
