①項 His constitutis rebus probatisque consiliis
ex perfugis quibusdam oppidanis audit
Iubam revocatum finitimo bello et controversiis Leptitanorum restitisse in regno,
Saburram, eius praefectum, cum mediocribus copiis missum Uticae adpropinquare.
②項 His auctoribus temere credens
consilium commutat et proelio rem committere constituit.
Multum ad hanc rem probandam adiuvat
adulescentia, magnitudo animi,
superioris temporis proventus,
fiducia rei bene gerendae.
③項 His rebus inpulsus
equitatum omnem prima nocte ad castra hostium mittit ad flumen Bagradam;
quibus praeerat Saburra, de quo ante erat auditum;
sed rex cum omnibus copiis insequebatur
et sex milium passuum intervallo ab Saburra consederat.
④項 Equites missi nocte iter conficiunt,
imprudentesque atque inopinantes hostes adgrediuntur.
Numidae enim quadam barbara consuetudine nullis ordinibus passim consederant.
⑤項 Hos oppressos somno et dispersos adorti
magnum eorum numerum interficiunt;
multi perterriti profugiunt.
Quo facto ad Curionem equites revertuntur
captivosque ad eum reducunt.
