①項 Isdem temporibus C. Curio in Africam profectus ex Sicilia
et iam ab initio copias P. Attii Vari despiciens
duas legiones ex IIII quas a Caesare acceperat, D equites transportabat
biduoque et noctibus tribus navigatione consumptis
adpellit ad eum locum qui appellatur Anquillaria.
②項 Hic locus abest a Clupeis passuum XXII milia
habetque non incommodam aestate stationem et duobus eminentibus promunturiis continetur.
③項 Huius adventum L. Caesar filius cum X longis navibus ad Clupeas praestolans,
quas naves Uticae ex praedonum bello subductas
P. Attius reficiendas huius belli causa curaverat,
veritus navium multitudinem ex alto refugerat
adpulsaque ad proximum litus trireme constrata
et in litore relicta pedibus Hadrumetum perfugerat.
④項 Id oppidum C. Considius Longus unius legionis praesidio tuebatur.
Reliquae Caesaris naves eius fuga se Hadrumetum receperunt.
⑤項 Hunc secutus Marcius Rufus quaestor navibus XII,
quas praesidio onerariis navibus Curio ex Sicilia eduxerat,
postquam in litore relictam navem conspexit, hanc remulco abstraxit;
ipse ad C. Curionem cum classe redit.
