①項 Massilienses omnibus defessi malis,
rei frumentariae ad summam inopiam adducti,
bis proelio navali superati,
crebris eruptionibus fusi,
gravi etiam pestilentia conflictati ex diutina conclusione et mutatione victus
── panico enim vetere atque hordeo corrupto omnes alebantur,
quod ad huiusmodi casus antiquitus paratum in publicum contulerant ──
deiecta turri, labefacta magna parte muri,
auxiliis provinciarum et exercituum desperatis,
quos in Caesaris potestatem venisse cognoverant,
sese dedere sine fraude constituunt.
②項 Sed paucis ante diebus
L. Domitius cognita Massiliensium voluntate
navibus III (tribus) comparatis,
ex quibus duas familiaribus suis adtribuerat,
unam ipse conscenderat, nactus turbidam tempestatem profectus est.
③項 Hunc conspicatae naves quae iussu Bruti consuetudine cotidiana ad portum excubabant,
sublatis ancoris sequi coeperunt.
④項 Ex his unum ipsius navigium contendit et fugere perseveravit
auxilioque tempestatis ex conspectu abiit,
duo perterrita concursu nostrarum navium sese in portum receperunt.
⑤項 Massilienses arma tormentaque ex oppido, ut est imperatum, proferunt,
naves ex portu navalibusque educunt,
pecuniam ex publico tradunt.
⑥項 Quibus rebus confectis
Caesar magis eos pro nomine et vetustate quam pro meritis in se civitatis conservans,
duas ibi legiones praesidio relinquit,
ceteras in Italiam mittit;
ipse ad urbem proficiscitur.
